پی ٹی آئی کا مقصد احتجاج نہیں ملک میں انارکی پیدا کرنا ہے: طلال چودھری

وزیرِ مملکت برائے داخلہ طلال چودھری نے اسلام آباد میں میڈیا سے گفتگو کرتے ہوئے کہا ہے کہ پاکستان تحریکِ انصاف (پی ٹی آئی) کا مقصد سیاسی یا پرامن احتجاج کرنا نہیں بلکہ ملک میں انارکی اور بدامنی پیدا کرنا ہے۔ انہوں نے کہا کہ پی ٹی آئی قیادت کی جانب سے سامنے آنے والے حالیہ بیانات ان کی اصل منصوبہ بندی اور ذہنیت کو بے نقاب کرتے ہیں، کیونکہ پرامن سیاسی احتجاج کے لیے کبھی اس قسم کی زبان اور حکمتِ عملی استعمال نہیں کی جاتی۔

وزیرِ مملکت نے پی ٹی آئی کے رہنما جنید اکبر کے بیان کا حوالہ دیتے ہوئے کہا کہ ان کے عزائم بالکل واضح ہو چکے ہیں۔ انہوں نے کہا کہ 26 نومبر کے واقعات میں مسلح افراد لائے گئے اور اہلکاروں کو کچلا گیا، جبکہ 9 مئی کے پرتشدد واقعات کے باوجود خود کو پرامن ثابت کرنے کی کوششیں کی جا رہی ہیں۔ طلال چودھری نے واضح کیا کہ دیگر تمام سیاسی جماعتیں قانون کے دائرے میں رہ کر احتجاج کا حق استعمال کرتی ہیں، مگر ریاست میں انارکی پھیلانے والے گروہوں سے سختی سے نمٹا جائے گا۔ انہوں نے شہریوں کے جان و مال کے تحفظ کو ریاست کی بنیادی ذمہ داری قرار دیتے ہوئے بتایا کہ وزیرِ داخلہ کی ہدایت پر جامع سیکیورٹی پلان تشکیل دے دیا گیا ہے۔