اسلام آباد کو 31 دسمبر تک پلاسٹک فری بنا دیا جائے گا: طلال چودھری

وزیر مملکت برائے داخلہ طلال چودھری نے بڑا اعلان کرتے ہوئے کہا ہے کہ وفاقی دارالحکومت اسلام آباد کو رواں سال 31 دسمبر 2026ء تک مکمل طور پر “پلاسٹک فری” (Plastic-Free) شہر بنا دیا جائے گا۔ اسلام آباد میں مہم کے آغاز پر گفتگو کرتے ہوئے انہوں نے انکشاف کیا کہ انہوں نے وزیراعظم سے ذاتی طور پر وعدہ کیا ہے کہ مقررہ مدت تک وفاقی دارالحکومت کو پلاسٹک کے کچرے سے پاک کر دیا جائے گا، جس کے لیے تجارتی تنظیموں، بزنس کمیونٹی اور عوام کی مشاورت سے آگاہی و عملی اقدامات جاری ہیں۔

طلال چودھری نے پلاسٹک کے ماحولیاتی نقصانات پر روشنی ڈالتے ہوئے کہا کہ پلاسٹک نہ صرف شہر کے سیوریج سسٹم کو بلاک کر کے نالوں کی بندش کا سبب بنتا ہے، بلکہ مٹی میں شامل ہونے کے بعد صدیوں تک تلف نہیں ہوتا اور شدید فضائی و زمینی آلودگی پیدا کرتا ہے۔ انہوں نے زور دیا کہ اس مہم کا بنیادی مقصد اسلام آباد کو پاک و ہرا بھرا (Clean & Green) بنانا ہے تاکہ آنے والی نسلوں کو ایک صحتمند اور آلودگی سے پاک ماحول فراہم کیا جا سکے۔ حکومت اس ہدف کے حصول کے لیے شہریوں کے تعاون سے پلاسٹک بیگز کے استعمال پر قابو پانے اور ماحول دوست متبادل متعارف کروانے پر کام کر رہی ہے۔