ایرانی صدر کی دفاعی معاہدے کی حمایت خوش آئند ہے: طاہر اشرفی

چیئرمین پاکستان علماء کونسل حافظ طاہر محمود اشرفی نے ایرانی صدر مسعود پزشکیان کی جانب سے مجوزہ اسلامی دفاعی معاہدے کی حمایت اور یمن کے حوثی باغیوں سے باضابطہ لاتعلقی کے اعلان کا پرخلوص خیرمقدم کرتے ہوئے اسے امتِ مسلمہ کے اتحاد کے لیے درست سمت میں ایک اہم اور تاریخی قدم قرار دیا ہے۔

لاہور سے جاری کردہ اپنے ایک خصوصی بیان میں حافظ طاہر محمود اشرفی نے کہا کہ اس مجوزہ اسلامی دفاعی معاہدے میں دیگر کلیدی مسلم ممالک کی شمولیت بھی جلد متوقع ہے، جو آنے والے دنوں میں عالمِ اسلام کے درمیان دفاعی، معاشی اور سفارتی تعاون کو مضبوط بنانے میں کلیدی کردار ادا کرے گی۔ انہوں نے زور دیا کہ موجودہ جیو پولیٹیکل حالات میں امتِ مسلمہ کا اتحاد اور یکجہتی خطے میں پائیدار امن، استحکام اور سلامتی کی ضامن ہے۔

چیئرمین پاکستان علماء کونسل کا مزید کہنا تھا کہ تمام اسلامی ممالک کے درمیان مشترکہ حکمتِ عملی اور یکجہتی وقت کی اہم ضرورت ہے، تاکہ مسلم امت درپیش چیلنجز کا یک زبان ہو کر مقابلہ کر سکے اور خطے کو بیرونی کشیدگی اور اندرونی انتشار سے محفوظ رکھا جا سکے۔