سوئٹزرلینڈ میں بس حادثہ، متعدد افراد ہلاک اور کئی زخمی

مشرقی سوئٹزرلینڈ کے کینٹن گراوبوئنڈن (Graubünden) کے ایک پہاڑی گاؤں میں مسافروں سے بھری سیاحتی بس کے خوفناک حادثے کے نتیجے میں متعدد افراد ہلاک اور کئی دیگر شدید زخمی ہو گئے۔ پولیس ترجمان کے مطابق حادثے کی اطلاع ملتے ہی بھاری تعداد میں امدادی ٹیمیں، ایئر ایمبولینس اور ریسکیو اہلکار جائے وقوعہ پر پہنچ گئے اور امدادی کارروائیاں شروع کر دیں۔ کینٹن گراوبوئنڈن پولیس نے سوشل میڈیا پلیٹ فارم ‘ایکس’ (سابقہ ٹوئٹر) پر جاری بیان میں تصدیق کی کہ حادثہ ایک غیر ملکی سیاحتی بس کو پیش آیا ہے، تاہم حادثے کی حتمی وجوہات کی تحقیقات کی جا رہی ہیں۔

جنرل ڈچ ایسوسی ایشن آف ٹریول کمپنیز کی ترجمان نے ہالینڈ کے مقامی میڈیا کو بتایا کہ حادثے کا شکار ہونے والی بس ‘او اے ڈی’ (OAD) ٹریول کمپنی کی تھی، جس میں ڈرائیور سمیت 48 مسافر سوار تھے۔ ترجمان کے مطابق بس میں سوار تمام افراد ڈچ (ہالینڈ) شہری اور کمپنی کے باقاعدہ صارف تھے جو سیاحتی دورے پر سوئٹزرلینڈ میں موجود تھے۔ حادثے کے بعد شدید تباہی کے باعث ہلاکتوں اور زخمیوں کی درست تعداد اور حالت کے بارے میں حتمی معلومات اکٹھی کی جا رہی ہیں