بانی پاکستان بابائے قوم قائداعظم محمدعلی جناحؒ کی 78 ویں برسی آج منائی جا رہی ہے

بانیِ پاکستان، بابائے قوم قائد اعظم محمد علی جناحؒ کی 78ویں برسی آج نہایت عقیدت و احترام اور ملکی عزم کی تجدید کے ساتھ منائی جا رہی ہے۔ برصغیر کے مسلمانوں کو ایک آزاد، خود مختار اور باوقار وطن کی نعمت سے سرفراز کرنے والے اس عظیم رہنما کی خدمات کو خراجِ تحسین پیش کرنے کے لیے ملک بھر میں خصوصی تقاریب، قرآن خوانی اور دعائیہ مجالس کا اہتمام کیا گیا ہے۔ 25 دسمبر 1876ء کو کراچی میں پیدا ہونے والے محمد علی جناحؒ نے اپنی بے مثال سیاسی بصیرت، اصول پسندی اور ان تھک جدوجہد سے دنیا کے نقشے پر الگ اسلامی ریاست کا خواب شرمندۂ تعبیر کر دکھایا۔

قیامِ پاکستان کے بعد شدید علالت کے باوجود قائد اعظمؒ نے دن رات کام کیا اور کراچی کو ملک کا پہلا دارالحکومت منتخب کیا۔ قیامِ پاکستان کے محض 13 ماہ بعد 11 ستمبر 1948ء کو عظیم قائد 71 برس کی عمر میں اس فانی دنیا سے کوچ کر گئے تھے۔ بانیِ پاکستان کا دیا ہوا زریں اصول “اتحاد، ایمان اور تنظیم” موجودہ دور کے تمام داخلی و خارجی چیلنجز سے نمٹنے کا بہترین لائحہ عمل ہے۔ آج کا دن اس امر کی یاد دہانی کرواتا ہے کہ ایک مضبوط، مستحکم اور باوقار پاکستان کی تعمیر صرف قائد کے نظریات پر صدقِ دل سے عمل پیرا ہو کر ہی ممکن ہے۔