حوثیوں نے باب المندب پر مکمل کنٹرول حاصل کر لیا، انصار اللہ کا دعویٰ

یمن کی انصار اللہ (حوثی) تحریک کے سینئر سیاسی و عسکری اہلکار محمد البخیتی نے دعویٰ کیا ہے کہ ان کی فورسز نے عالمی سطح پر انتہائی اہمیت کے حامل بحری راستے باب المندب پر مکمل کنٹرول حاصل کر لیا ہے۔ باب المندب کی گزرگاہ دنیا بھر میں ایندھن، قدرتی گیس اور غذائی اجناس کی ترسیل کے لیے ریڑھ کی ہڈی کی حیثیت رکھتی ہے، جس کی مکمل ناکہ بندی یا کنٹرول سے عالمی اقتصادیات پر انتہائی گہرے اثرات مرتب ہو سکتے ہیں۔

ایرانی ذرائع ابلاغ کے مطابق حوثی جنگجوؤں نے یمن کے مغربی صوبے تعز میں کلیدی اہمیت کی حامل دفاعی تنصیبات اور الخالد اور جبل النصر سمیت اہم عسکری اڈوں پر قبضہ جما لیا ہے۔ اس پیش رفت سے قبل یہ اطلاعات بھی سامنے آئی تھیں کہ حوثی فورسز بحیرہ احمر کے ساحل پر واقع تاریخی اور اسٹریٹجک المخا (Mokha) ایئرپورٹ کا کنٹرول سنبھال چکی ہیں، جبکہ ان کا مقابلہ کرنے والی مخالف سیکیورٹی فورسز کی بڑی تعداد نے بھاری ہتھیار ڈال کر سرنڈر کر دیا ہے