ایران کی حملوں کے باوجود بیلسٹک میزائلوں کی تیاری دوبارہ شروع

امریکی اور اسرائیلی فضائی کارروائیوں کے باوجود ایران نے زیرِ زمین محفوظ تنصیبات میں اپنے بیلسٹک میزائلوں کی تیاری اور اسمبلی کا عمل دوبارہ شروع کر دیا ہے۔ بین الاقوامی انٹیلی جنس معلومات اور امریکی اخبار ‘وال اسٹریٹ جرنل’ کی رپورٹ کے مطابق، تہران اپنے پاس پہلے سے موجود پرزہ جات اور گائیڈنس سسٹمز کی مدد سے نئے میزائل تیار کر رہا ہے۔ ان میں مائع ایندھن (Liquid-fueled) کے ساتھ ساتھ ٹھوس ایندھن (Solid-fueled) پر چلنے والے وہ بیلسٹک میزائل بھی شامل ہیں جنہیں کسی بھی وقت فوری فائرنگ کے لیے مستعد رکھا جا سکتا ہے۔

رپورٹ میں نشاندہی کی گئی ہے کہ سابقہ حملوں میں اہم پرزہ جات تیار کرنے والی متعدد صنعتی تنصیبات کی تباہی کے باعث فی الوقت یہ پیداوار محدود سطح پر جاری ہے۔ تاہم، ایران نے جنگ سے قبل ہی بڑی تعداد میں وار ہیڈز، میزائل باڈیز اور کنٹرول سسٹمز ذخیرہ کر لیے تھے، جنہیں اب زیرِ زمین سرنگوں اور خفیہ سائٹس پر یکجا کیا جا رہا ہے۔ اس کے علاوہ، ایرانی حکام مستقبل کے فضائی حملوں سے بچنے کے لیے نئی محفوظ اور جدید زیرِ زمین اسمبلی سائٹس کی تعمیر بھی تیزی سے جاری رکھے ہوئے ہیں۔