سوات میں پی ٹی آئی ارکان اسمبلی سمیت 200 افراد کیخلاف مقدمہ درج

خیبر پختونخوا کے ضلع سوات کے تھانہ سیدو شریف میں پاکستان تحریک انصاف (پی ٹی آئی) کے کئی قومی و صوبائی اسمبلی کے ارکان سمیت 200 سے زائد افراد کے خلاف مختلف دفعات کے تحت مقدمہ درج کر لیا گیا ہے۔

تھانہ سیدو شریف میں درج کی گئی ایف آئی آر (FIR) میں پی ٹی آئی کے ایم این اے ڈاکٹر امجد، ایم این اے سہیل سلطان، ایم پی اے فضل حکیم، ایم پی اے علی شاہ خان، ایم پی اے اختر خان اور ایم پی اے حمید الرحمان کو نامزد کیا گیا ہے۔ درج مقدمے میں پولیس و انتظامی افسران کے خلاف نازیبا الفاظ استعمال کرنے، سرکاری کام میں مداخلت اور مرکزی سڑک کو بند کر کے عام شہریوں کی رفت و آمد میں رکاوٹ ڈالنے کے الزامات شامل کیے گئے ہیں۔

واضح رہے کہ پاکستان تحریک انصاف کی مقامی قیادت اور کارکنوں نے گزشتہ ماہ 28 ستمبر کو سوات میں کمشنر مالاکنڈ ڈویژن اور ڈی آئی جی پولیس کے دفاتر کے سامنے احتجاجی مظاہرہ اور دھرنا دیا تھا، جس کے دوران مبینہ طور پر سڑکیں بلاک کی گئی تھیں اور افسران کے خلاف نعرے بازی کی گئی تھی۔