ڈویڈنڈ انکم پر 35 فیصد ٹیکس وصولی کا ایف بی آر کا موقف مسترد

سپریم کورٹ آف پاکستان نے کمپنیوں کی ڈویڈنڈ انکم پر 35 فیصد نارمل کارپوریٹ ٹیکس وصول کرنے سے متعلق فیڈرل بورڈ آف ریونیو (ایف بی آر) کا موقف مسترد کرتے ہوئے ٹیکس دہندہ کمپنیوں کے حق میں بڑا فیصلہ سنا دیا ہے۔ جسٹس عقیل احمد عباسی کا تحریر کردہ یہ اہم فیصلہ اسلام آباد ہائیکورٹ کے سابقہ فیصلے کو برقرار رکھتے ہوئے جاری کیا گیا، جس میں ایف بی آر کی تمام سول پٹیشنز اور اپیلیں میرٹ سے عاری قرار دے کر خارج کر دی گئیں۔ سپریم کورٹ نے اپنے فیصلے میں واضح کیا کہ انکم ٹیکس آرڈیننس 2001 کے تحت ڈویڈنڈ انکم ایک الگ ٹیکس بلاک ہے جس پر صرف سیکشن 5 کے تحت 10 فیصد کا حتمی (Final) ٹیکس لاگو ہوتا ہے، جبکہ سیکشن 39 کا اطلاق اس پر نہیں کیا جا سکتا۔ یہ کیس سعودی پاک انڈسٹریل اینڈ ایگریکلچرل انویسٹمنٹ کمپنی، فوجی فاؤنڈیشن اور فوجی فرٹیلائزر سمیت متعدد بڑی کمپنیوں کی جانب سے دائر کیا گیا تھا۔