سپریم کورٹ کا سزائے موت کے خلاف اہم فیصلہ، بیوی اور بیٹی کے قاتل کی سزا عمر قید میں تبدیل

سپریم کورٹ نے بیوی اور بیٹی کے قاتل محمد امین کی سزائے موت کو عمر قید میں تبدیل کر دیا ہے۔ جسٹس اشتیاق ابراہیم نے تحریری فیصلہ جاری کرتے ہوئے کہا کہ زندہ بچ جانے والے واحد والدین کو پھانسی دینا عدلیہ کی سرپرستی میں بچوں کو یتیم کرنے کے مترادف ہے۔

عدالت نے کہا کہ ریاست کو بچوں کی مکمل بیچارگی اور خاندان کی تباہی کا سبب نہیں بننا چاہیے، اور اقوام متحدہ کے کنونشن کے تحت بچوں کے بہترین مفاد کو مدنظر رکھنا ریاست کی ذمہ داری ہے۔

سپریم کورٹ کے فیصلے میں واضح کیا گیا کہ جب وارث مقتول کا براہ راست وارث ہو تو دفعہ 306 کے تحت قصاص نافذ نہیں کیا جا سکتا، اور مجرم اپنی 15 سالہ بیٹی کا واحد سہارا ہے۔

تاہم، جرم کی سنگینی اور بربریت کے باعث عدالت نے ملزم کو دفعہ 382-B کے تحت سزا میں رعایت دینے سے انکار کیا۔

ملزم محمد امین پر اپریل 2021 میں وہاڑی میں اپنی اہلیہ اور بیٹی کو خنجر کے وار کر کے قتل کرنے کا مقدمہ درج ہوا تھا۔ واقعہ سے ایک روز قبل زرعی زمین کی فروخت کے معاملے پر جھگڑا ہوا تھا۔ ملزم نے اپنی بیوی پر 21 اور بیٹی پر 8 وار کیے جبکہ دوسری بیٹی زخمی ہوئی۔

ٹرائل کورٹ نے ملزم کو دو مرتبہ سزائے موت سنائی تھی اور لاہور ہائیکورٹ ملتان بینچ نے سزائے موت برقرار رکھنے کا حکم دیا تھا، لیکن سپریم کورٹ نے اسے عمر قید میں تبدیل کر دیا۔