چیف جسٹس یحییٰ آفریدی کا سیشن جج عبدالحکیم کاکڑ کے قتل پر اظہار افسوس

سپریم کورٹ آف پاکستان نے بلوچستان کے علاقے مستونگ میں ہونے والے افسوسناک حملے میں ڈسٹرکٹ اینڈ سیشن جج عبدالحکیم کاکڑ اور ان کے سیکیورٹی اہلکار (گن مین) کی شہادت پر گہرے دکھ اور افسوس کا اظہار کیا ہے۔ چیف جسٹس آف پاکستان یحییٰ آفریدی نے ایک تعزیتی پیغام جاری کرتے ہوئے شہید جج اور سیکیورٹی اہلکار کو خراجِ عقیدت پیش کیا اور ان کے اہلِ خانہ سے دلی ہمدردی کا اظہار کرتے ہوئے مرحومین کے لیے درجات کی بلندی کی دعا کی۔ چیف جسٹس نے واقعے میں زخمی ہونے والے ایڈیشنل سیشن جج طارق لشاری اور جوڈیشل مجسٹریٹ کی جلد و مکمل صحتیابی کے لیے بھی نیک تمناؤں کا اظہار کیا۔ اس المناک واقعے کے پیشِ نظر اور بلوچستان کی عدلیہ و شہداء کے خاندانوں سے مکمل یکجہتی کے طور پر 25 جولائی کو منعقد ہونے والی جوڈیشل ویلبیئنگ کانفرنس ملتوی کر دی گئی ہے۔ چیف جسٹس یحییٰ آفریدی نے عزم کا اعادہ کرتے ہوئے کہا کہ تشدد اور دھمکیوں کے ذریعے انصاف کی فراہمی کی راہ میں رکاوٹ نہیں ڈالی جا سکتی اور پاکستان کی عدلیہ قانون کی حکمرانی اور آئین کی پاسداری کے اپنے عزم پر مضبوطی سے قائم رہے گی۔