سپریم کورٹ نے مبینہ طور پر بیٹے کو زہر دے کر قتل کرنے والے والد کو بری کر دیا

سپریم کورٹ نے سکھر میں مبینہ طور پر اپنے کمسن بیٹے کو زہر دے کر قتل کرنے کے الزام میں سزائے موت پانے والے ملزم سلطان عرف ببو جتوئی کو بری کرتے ہوئے ہائیکورٹ اور ٹرائل کورٹ کے فیصلے کالعدم قرار دے دیے۔ عدالتِ عظمیٰ نے ملزم کو فوری رہا کرنے کا حکم جاری کیا ہے۔

جسٹس اشتیاق ابراہیم کے تحریری فیصلے میں کہا گیا کہ ایک باپ کا اپنے ہی بیٹے کو زہر دینا انسانی فطرت کے خلاف ہے اور استغاثہ یہ ثابت کرنے میں ناکام رہا کہ ملزم نے قتل کا ارادہ کیا۔ فیصلے میں مزید کہا گیا کہ گھر میں کیڑے مار ادویات موجود تھیں اور ممکن ہے کہ بچہ خود بھی ان کا استعمال کر بیٹھا ہو۔ میڈیکل رپورٹ کے مطابق چار سالہ بچہ زہریلی اور پینے والی چیز میں فرق نہیں کر سکتا۔

عدالت نے گواہوں کے بیانات میں تضادات اور غیر فطری نکات کی نشاندہی کی، چشم دید گواہوں نے موقع پر کوئی ٹھوس وجہ بیان نہیں کی اور انہیں اتفاقیہ گواہ قرار دیا گیا۔ بچے کے لباس کے رنگ کے حوالے سے ڈاکٹر اور گواہوں کے بیانات میں بھی تضاد پایا گیا۔ غیر واضح تاخیر سے درج ایف آئی آر نے بھی کیس کی صداقت پر سوال اٹھائے۔ عدالت نے کہا کہ شک کا ایک پہلو بھی ملزم کو بریت کا حق دیتا ہے۔

واضح رہے کہ اگست 2019 میں چار سالہ مدثر عرف میٹھو کی موت واقع ہوئی تھی اور اس کے والد پر الزام تھا کہ اس نے گواہوں کی موجودگی میں بچے کو زہریلی چیز پلائی تھی۔ بعد ازاں ٹرائل کورٹ اور ہائیکورٹ نے ملزم کو سزائے موت سنائی تھی۔