طالبہ لائبہ اعجاز کی مبینہ خودکشی ، ملزم کی گرفتاری کے لیے ایف آئی اے متحرک

وفاقی دارالحکومت اسلام آباد میں طالبہ لائبہ اعجاز کی مبینہ خودکشی کے افسوسناک واقعے کے تناظر میں مالیاتی اور آن لائن فراڈ میں ملوث مرکزی ملزمان کی گرفتاری کے لیے وفاقی تحقیقاتی ادارہ (ایف آئی اے) متحرک ہو گیا ہے۔ واقعے کی سنگینی کو مدِنظر رکھتے ہوئے ایف آئی اے کے ڈائریکٹر شہزاد بخاری نے اسپیشل ٹیمیں تشکیل دے کر فوری اور سخت قانونی کارروائی کی ہدایت جاری کی ہیں۔

ڈائریکٹر ایف آئی اے شہزاد بخاری کے مطابق آن لائن اور مالیاتی دھوکہ دہی کے اس معاملے میں مرکزی ملزم نعمان کی ابتدائی شناخت کر لی گئی ہے۔ ملزم نعمان نے دھوکہ دہی اور فراڈ کے دوران خود کو سپریم کورٹ آف پاکستان کا اکاؤنٹنٹ ظاہر کیا تھا، جبکہ اس کے ساتھ ایک عورت بھی اس گھناؤنے سائے میں برابر کی شریک کار بتائی جاتی ہے۔ ایف آئی اے نے دونوں مبینہ ملزمان کے حوالے سے نادرا اور بینکوں سے ڈیٹا حاصل کر کے ان کے نام بیرونِ ملک فرار سے روکنے کے لیے ‘سٹاپ لسٹ’ میں شامل کر دیے ہیں۔ حکام کا کہنا ہے کہ تشکیل دی گئی ایف آئی اے ٹیمیں مختلف مقامات پر چھاپے مار رہی ہیں اور ملزمان کو جلد گرفتار کر کے قانون کے کٹہرے میں لایا جائے گا