بھارت کی طرف سے پاکستان کا پانی روکنا سنگین نتائج پیدا کر سکتا ہے: صدرِ مملکت

اسلام آباد: صدر مملکت آصف علی زرداری نے اقوام متحدہ کے انسانی حقوق ماہرین کی بھارت سے متعلق رپورٹ کا خیرمقدم کرتے ہوئے کہا ہے کہ رپورٹ میں بھارتی عسکری کارروائیوں اور عالمی امن و استحکام پر ان کے منفی اثرات سے متعلق سنگین خدشات کا اظہار کیا گیا ہے۔

صدر مملکت نے کہا کہ یہ رپورٹ پاکستان کے دیرینہ موقف کی توثیق کرتی ہے۔ انہوں نے سندھ طاس معاہدے کی یکطرفہ معطلی اور جارحانہ بھارتی رویے سے متعلق رپورٹ میں دیے گئے مشاہدات کو سراہا۔

آصف علی زرداری نے کہا کہ پانی کے بہاؤ کو متاثر کرنے والی بھارتی کارروائیاں پاکستان کے حقوق کی صریح خلاف ورزی ہیں، جبکہ انسانی حقوق ماہرین کی رپورٹ بھارتی طرزِ عمل پر بڑھتے ہوئے عالمی خدشات کی عکاسی بھی کرتی ہے۔

صدر مملکت کا کہنا تھا کہ بھارت قانون اور مکالمے کے بجائے دھمکی، طاقت اور تشدد کی پالیسی پر عمل پیرا ہے، جبکہ دیگر ممالک میں مداخلت اور قتل و غارت کی رپورٹس ایک خطرناک رجحان کی نشاندہی کرتی ہیں۔

انہوں نے مزید کہا کہ بھارت اقلیتوں کو دیوار سے لگانے کی پالیسی پر گامزن ہے، اور اقوام متحدہ کے انسانی حقوق ماہرین کی رپورٹ نے بھارت کے غیر ذمہ دارانہ ریاستی طرزِ عمل کو بے نقاب کر دیا ہے۔