اسٹیٹ بینک کے زرمبادلہ ذخائر میں ایک ارب 94 کروڑ ڈالر سے زائد کا بڑا اضافہ، مجموعی ملکی ذخائر تقریباً 24 ارب ڈالر تک پہنچ گئے

ملک کے زرمبادلہ کے ذخائر میں بڑا اضافہ ریکارڈ کیا گیا ہے اور اسٹیٹ بینک آف پاکستان کے اپنے ذخائر میں ایک ارب 94 کروڑ 40 لاکھ ڈالر کا نمایاں اضافہ ہوا ہے۔ مرکزی بینک کی جانب سے جاری کردہ اعداد و شمار کے مطابق، اس اضافے کے بعد اسٹیٹ بینک کے پاس موجود زرمبادلہ کے ذخائر بڑھ کر 18 ارب 47 کروڑ 10 لاکھ ڈالر ہو گئے ہیں۔ اسٹیٹ بینک کا کہنا ہے کہ یہ اضافہ حکومت کو بین الاقوامی مالیاتی اداروں سے قرض کی رقوم حاصل ہونے کے باعث ہوا ہے۔ دوسری جانب، کمرشل بینکوں کے پاس موجود زرمبادلہ کے ذخائر 5 ارب 51 کروڑ 77 لاکھ ڈالر ریکارڈ کیے گئے ہیں، جس کے بعد پاکستان کے مجموعی زرمبادلہ کے ذخائر کی مالیت 23 ارب 98 کروڑ 87 لاکھ ڈالر کی سطح پر پہنچ گئی ہے۔