خلا میں اسٹار لنک سیٹلائٹ قابو سے باہر، اسپیس ایکس کی وارننگ جاری

ایلون مسک کی کمپنی اسپیس ایکس نے خبردار کیا ہے کہ مدار میں موجود اسٹار لنک سیٹلائٹس میں سے ایک تکنیکی خرابی کے باعث کمپنی کے قابو سے باہر ہو چکا ہے۔

اسپیس ایکس کے مطابق بدھ کے روز اسپیس انٹرنیٹ سیٹلائٹ کو تکنیکی مسئلہ درپیش آیا، جس کے بعد وہ چھوٹے چھوٹے حصوں میں ٹوٹ گیا۔ کمپنی کا کہنا ہے کہ سیٹلائٹ کا مرکزی حصہ اس وقت خلا میں تیر رہا ہے اور آئندہ چند ہفتوں کے دوران مدار سے زمین کی جانب گرنے کا امکان ہے۔

اسپیس ایکس کی جانب سے جاری بیان میں کہا گیا ہے کہ خرابی کے باعث پروپلژن ٹینک خالی ہو گیا، جس کے نتیجے میں سیمی-میجر ایکسز میں تیزی سے کمی واقع ہوئی (تقریباً 4 کلو میٹر)، جبکہ نسبتاً کم رفتار سے چند پرزے الگ ہو کر باہر نکل گئے۔

بیان میں مزید کہا گیا ہے کہ سیٹلائٹ فی الحال بڑی حد تک سالم حالت میں خلا میں موجود ہے، تاہم توقع ہے کہ چند ہفتوں میں زمین کے ایٹماسفیئر میں دوبارہ داخل ہو کر مکمل طور پر تباہ ہو جائے گا۔