سری لنکن ٹیم شیڈول کے مطابق دورہ پاکستان جاری رکھے گی،سر ی لنکن کرکٹ بورڈ

سری لنکا ٹیم نے دورہ پاکستان شیڈول کے مطابق جاری رکھنے کا باضابطہ اعلان کردیا جس کے بعد افواہیں دم توڑ گئیں۔
سری لنکن کرکٹ بورڈ نے پاکستان کے جاری دورے سے متعلق باضابطہ اعلامیہ جاری کر دیا ہے۔ بورڈ کے مطابق قومی ٹیم کے چند کھلاڑیوں نے سیکیورٹی خدشات کے باعث وطن واپس جانے کی درخواست کی تھی، تاہم سری لنکن کرکٹ بورڈ نے تمام کھلاڑیوں، سپورٹ اسٹاف اور ٹیم مینجمنٹ کو ہدایت کی ہے کہ وہ طے شدہ شیڈول کے مطابق دورہ جاری رکھیں۔
اعلامیہ میں کہا گیا ہے کہ سری لنکن کرکٹ بورڈ اور پاکستان کرکٹ بورڈ (پی سی بی) کھلاڑیوں کی سلامتی اور سیکیورٹی کے لیے قریبی رابطے میں ہیں۔ پی سی بی نے سری لنکن ٹیم کو فول پروف سیکیورٹی فراہم کرنے کی یقین دہانی کرائی ہے۔
سری لنکن کرکٹ بورڈ نے واضح کیا ہے کہ اگر کوئی کھلاڑی یا عملے کا رکن ہدایات کے برخلاف وطن واپس جاتا ہے تو اس کے عمل کا باضابطہ جائزہ لیا جائے گا، اور دورہ بلا تعطل جاری رکھنے کے لیے فوری طور پر متبادل کھلاڑی بھیجے جائیں گے۔ترجمان سری لنکن کرکٹ بورڈ کے مطابق، کھلاڑیوں کی سلامتی اولین ترجیح ہے، اور پی سی بی نے فول پروف سیکیورٹی کی مکمل ضمانت دی ہے۔سری لنکن ٹیم اپنے شیڈول کے مطابق پاکستان کا دورہ جاری رکھے گی۔