پاکستان کا سری لنکن کرکٹ ٹیم سے دل کی گہرائیوں سے شکریہ

اسلام آباد: سری لنکن کرکٹ ٹیم کے جانب سے دورۂ پاکستان جاری رکھنے کے فیصلے پر پاکستانی عوام، حکومتی شخصیات اور کرکٹ شائقین نے دل کی گہرائیوں سے شکریہ ادا کیا ہے۔
سری لنکن کرکٹ بورڈ نے اپنے اعلامیے میں کھلاڑیوں اور مینجمنٹ کو ہدایت کی ہے کہ وہ شیڈول کے مطابق پاکستان کا دورہ جاری رکھیں۔ اس فیصلے کو پاکستان میں ہر سطح پر سراہا جا رہا ہے۔
پاکستان کرکٹ بورڈ (پی سی بی) کے چیئرمین محسن نقوی نے سماجی رابطے کی ویب سائٹ X (سابقہ ٹوئٹر) پر سری لنکن ٹیم کے فیصلے پر اظہارِ تشکر کرتے ہوئے کہا کہ: “ہم سری لنکن ٹیم کے پاکستان ٹور جاری رکھنے کے فیصلے پر شکر گزار ہیں۔ سیریز کے اگلے دونوں میچز 14 اور 16 نومبر کو راولپنڈی کرکٹ اسٹیڈیم میں ہوں گے۔”
وزیرِ اطلاعات عطا تارڑ نے اپنے بیان میں کہا کہ “پاکستان آمد پر سری لنکن کرکٹ ٹیم کا دل کی گہرائیوں سے شکریہ ادا کرتا ہوں۔ کرکٹ کے کھیل کے لیے ہمیشہ حمایت کرنے پر ہم سری لنکن ٹیم کے مشکور ہیں۔”
وزیر دفاع خواجہ آصف نے بھی سری لنکن ٹیم کے فیصلے کو سراہتے ہوئے کہا: “پاکستان آمد اور شاندار کرکٹ کھیل پیش کرنے پر سری لنکن ٹیم کا شکریہ ادا کرتے ہیں۔ ہماری نیک تمنائیں ان کے ساتھ ہیں۔”
سری لنکن کرکٹ بورڈ نے اپنے اعلامیے میں واضح کیا ہے کہ اگر کوئی کھلاڑی دورہ جاری نہیں رکھنا چاہتا تو اس کے متبادل کا انتظام کیا جائے گا۔
بیان میں مزید کہا گیا کہ بورڈ، ٹیم اور عملے کی حفاظت اولین ترجیح ہے اور پاکستان کرکٹ بورڈ نے فول پروف سیکیورٹی کی یقین دہانی کرائی ہے۔
سری لنکن ٹیم کے فیصلے کے بعد پاکستان میں کرکٹ کے شائقین نے ٹیم کے لیے نیک تمناؤں کا اظہار کرتے ہوئے کہا ہے کہ دونوں ممالک کے درمیان دوستی اور کھیل کے رشتے مزید مضبوط ہوں گے۔