سری لنکا نے ورک فرام ہوم پروفیشنلز کے لیے ڈیجیٹل نوماڈ ویزا متعارف کروا دیا 

کولمبو: خوبصورت ایشیائی ملک سری لنکا نے ورک فرام ہوم کرنے والے پروفیشنلز کو خوش آمدید کہنے کے لیے نیا ڈیجیٹل نوماڈ ویزا پروگرام متعارف کروا دیا ہے۔ اس پروگرام کا مقصد غیر ملکی ماہرین کی توجہ حاصل کرنا ہے تاکہ وہ سری لنکا میں رہتے ہوئے کسی بیرونی کمپنی، فری لانس کام یا اپنا کاروبار انجام دے سکیں۔

ویزا کے لیے درخواست گزاروں کی کم از کم ماہانہ آمدنی 2 ہزار ڈالرز ہونی چاہیے، اور اگر خاندان کے دیگر افراد بھی شامل ہوں تو ہر اضافی فرد کے لیے 500 ڈالرز ماہانہ کا اضافہ لازم ہوگا۔ درخواست گزار کو ہیلتھ انشورنس، رہائش کے انتظامات، اور اپنے ملک میں جرائم سے پاک ریکارڈ کا ثبوت فراہم کرنا ہوگا۔

ویزا حاصل کرنے والے افراد کو ایک سال تک سری لنکا میں قیام کی اجازت ہوگی، جس میں مزید توسیع بھی ممکن ہے، اور وہ سری لنکا میں بینک اکاؤنٹ کھولنے اور بچوں کو اسکولوں میں داخل کروانے کے اہل ہوں گے۔