امریکی فضائی کمپنی اسپرٹ ایئرلائنز مالی بحران کے باعث بند، تمام پروازیں منسوخ

امریکا کی کم لاگت فضائی کمپنی اسپرٹ ایئرلائنز نے شدید مالی بحران کے باعث اپنی تمام پروازیں منسوخ کرتے ہوئے آپریشنز مکمل طور پر بند کرنے کا اعلان کر دیا ہے۔

کمپنی کی جانب سے جاری بیان کے مطابق 2 مئی 2026 سے مرحلہ وار آپریشن ختم کرنے کا عمل شروع کر دیا گیا ہے، جس کے بعد مسافروں کو ایئرپورٹ نہ آنے کی ہدایت بھی کی گئی ہے۔ کمپنی نے واضح کیا ہے کہ کریڈٹ یا ڈیبٹ کارڈ کے ذریعے خریدے گئے ٹکٹس کی رقم واپس کی جائے گی، تاہم واؤچر، پوائنٹس یا دیگر ذرائع سے بکنگ کرنے والے مسافروں کو مشکلات کا سامنا ہو سکتا ہے۔

اسپرٹ ایئرلائنز، جو گزشتہ 34 برس سے کم قیمت فضائی سفر کی پہچان سمجھی جاتی تھی، گزشتہ کئی برسوں سے خسارے کا شکار تھی۔ کمپنی دوسری بار دیوالیہ ہونے کے عمل سے گزر رہی تھی، جبکہ ایران میں جنگ کے باعث ایندھن کی قیمتوں میں اضافے نے صورتحال مزید سنگین بنا دی۔

کمپنی کی بندش کے نتیجے میں تقریباً 17 ہزار افراد بے روزگار ہو گئے ہیں، جن میں ہزاروں ملازمین اور کنٹریکٹ ورکرز شامل ہیں۔ ماہرین کے مطابق اس فیصلے سے امریکا میں فضائی کرایوں میں اضافے کا خدشہ بھی پیدا ہو گیا ہے۔

امریکی حکام کے مطابق بڑی ایئرلائنز نے متاثرہ مسافروں کے لیے محدود رعایتی کرایے متعارف کرائے ہیں، تاہم یہ سہولت عارضی ہے۔