ڈائیلاگ کے سوا کوئی حل نہیں، مذاکرات کیلئے آئیں، طاقت سے آپ کچھ نہیں منوا سکتے: ملک احمد خان

سپیکر پنجاب اسمبلی ملک محمد احمد خان نے ملکی سیاسی و معاشی صورتِ حال پر تشویش کا اظہار کرتے ہوئے واضح کیا ہے کہ موجودہ سیاسی بحران کا حل صرف اور صرف سنجیدہ مذاکرات اور ڈائیلاگ میں مضمر ہے، طاقت یا دھرنوں کے ذریعے کسی سے کوئی مطالبہ تسلیم نہیں کرایا جا سکتا। انہوں نے کہا کہ اپوزیشن کا منفی رویہ خود ان کی سیاسی جگہ (Political Space) کو محدود کر رہا ہے۔

پشتونخوا ملی عوامی پارٹی کے سربراہ محمود خان اچکزئی کے بیان کو سراہتے ہوئے سپیکر پنجاب اسمبلی نے کہا کہ ان کی جانب سے قائد ن لیگ میاں نواز شریف سے مذاکرات کی بات کرنا ایک مثبت قدم ہے۔ انہوں نے متنبہ کیا کہ ملک میں احتجاج اور دھرنوں کی سیاست سے ملکی معیشت کو شدید نقصان پہنچتا ہے۔ ملک احمد خان کا کہنا تھا کہ نو مئی جیسے واقعات میں فوجی تنصیبات پر حملے کرنے والے عناصر کاروباری مراکزی اور دکانوں کو بھی نقصان پہنچا سکتے ہیں، جس سے تاجر برادری میں خوف کی لہر پھیلتی ہے۔ انہوں نے زور دیا کہ ملک میں سیاسی استحکام ہی سے تجارت فروغ پائے گی، معیشت مستحکم ہوگی اور نوجوانوں کے لیے روزگار کے نئے مواقع پیدا ہوں گے۔