مولانا کو عمرے کی مبارکباد دینے آیا، ملک کی بہتری کیلئے دعا گو ہوں: سپیکر قومی اسمبلی

سپیکر قومی اسمبلی سردار ایاز صادق نے جمعیت علمائے اسلام (جے یو آئی) کے سربراہ مولانا فضل الرحمان سے ملاقات کی ہے، جس کے بعد میڈیا سے گفتگو کرتے ہوئے انہوں نے کہا کہ وہ مولانا کو عمرے کی مبارکباد دینے آئے تھے اور ان کا رشتہ بھائیوں جیسا ہے۔ انہوں نے اس تاثر کو رد کیا کہ حکومت میں آنے کے بعد مسلم لیگ ن نے مولانا فضل الرحمان کو فراموش کر دیا ہے۔ ملکی سیاسی صورتحال اور مفاہمتی کوششوں سے متعلق سوال پر سردار ایاز صادق نے پختہ امید کا اظہار کیا کہ اللہ تعالیٰ پاکستان کے لیے بہتری کے راستے بنائے گا۔ انہوں نے انکشاف کیا کہ سیاسی استحکام کے لیے بیک ڈور رابطے اور مذاکرات کا سلسلہ جاری ہے، اور قومی اسمبلی کے ساتھیوں کے ساتھ بھی باقاعدگی سے بات چیت ہوتی رہتی ہے۔