اسپیکر قومی اسمبلی سردار ایاز صادق کی زیرِ صدارت حکومت اور اپوزیشن ارکان کا اہم جرگہ، سیاسی کشیدگی کے خاتمے کے لیے مذاکرات جاری

قومی اسمبلی سیکرٹریٹ کے ڈائریکٹوریٹ جنرل آف میڈیا کے مطابق اسپیکر قومی اسمبلی سردار ایاز صادق کی زیرِ صدارت حکومت اور اپوزیشن ارکان کا انتہائی اہم اجلاس پارلیمنٹ ہاؤس میں جاری ہے۔ اجلاس کے دوران گفتگو کرتے ہوئے اسپیکر سردار ایاز صادق نے کہا کہ وہ اس پورے عمل میں صرف ایک سہولت کار کا کردار ادا کر رہے ہیں اور اختلافِ رائے یا مسائل کے حل کا واحد راستہ صرف اور صرف مذاکرات ہیں۔ انہوں نے اس عزم کا اظہار کیا کہ پارلیمان ہی وہ واحد فورم ہے جہاں تمام قومی مسائل کا آئینی اور سیاسی حل نکالا جا سکتا ہے، جبکہ ان کا دفتر ہمیشہ بات چیت کے لیے کھلا ہے۔ اجلاس میں حکومتی اتحاد اور اپوزیشن کی اعلیٰ ترین قیادت شریک ہے جن میں وفاقی وزراء امیر مقام، رانا ثناء اللہ، محسن نقوی، طلال چوہدری، طارق فضل چوہدری، سینیٹر شیری رحمان، نوید قمر اور اعجاز حسین جاکھرانی شامل ہیں۔ دوسری جانب اپوزیشن کی طرف سے محمود خان اچکزئی، بیرسٹر گوہر خان، علامہ راجہ ناصر عباس، ملک عامر ڈوگر اور سابق اسپیکر اسد قیصر سمیت سلمان اکرم راجہ بھی اس اہم مشاورتی اجلاس میں شرکت کر رہے ہیں۔ شرکاء نے موجودہ سیاسی ڈیڈلاک کے خاتمے کے لیے لائحہ عمل پر غور شروع کر دیا ہے۔