ایران جنگ سے یورپی شہریوں کو 100 ارب یورو کا نقصان ہوچکا: سپین

اسپین نے خبردار کیا ہے کہ ایران کے خلاف جاری جنگ کے باعث اب تک یورپی شہریوں کو 100 ارب یورو سے زائد کا شدید معاشی نقصان برداشت کرنا پڑا ہے اور اس جنگ کے اثرات عام عوام پر انتہائی بھاری پڑ رہے ہیں۔

اسپین کے وزیراعظم پیڈرو سانچیز نے سوشل میڈیا پلیٹ فارم ‘ایکس’ پر جاری کردہ اپنے ایک ویڈیو پیغام اور برسلز میں یورپی کونسل کے اجلاس کے بعد پریس کانفرنس کرتے ہوئے کہا کہ اس جنگ کی مخالفت کرنے والے یورپی رہنماؤں کا مؤقف بالکل درست ثابت ہوا ہے۔ ان کا کہنا تھا کہ بین الاقوامی قوانین، انسانی حقوق اور تباہ کن معاشی و سماجی اثرات نے ثابت کر دیا ہے کہ جنگ کو ’نہ‘ کہنے کا فیصلہ ہی درست تھا۔

ہسپانوی وزیراعظم نے بتایا کہ ان کی پارلیمان نے جنگ سے متاثرہ شعبوں اور نجی گاڑیاں استعمال کرنے والے شہریوں کے لیے 12 ارب یورو کے جامع امدادی پیکج کی منظوری دے دی ہے۔ انہوں نے زور دے کر کہا کہ اس وقت سب سے اہم اور بنیادی ہدف اس تباہ کن جنگ کو جلد از جلد ختم کروانا ہے۔