جنوبی افریقا ویمنز انڈر 19 ٹیم پہلی بار پاکستان پہنچ گئی

جنوبی افریقا کی ویمنز انڈر 19 کرکٹ ٹیم اپنے پہلے تاریخی دورے پر کراچی پہنچ گئی ہے، جہاں انہیں وی وی آئی پی پروٹوکول اور سخت سکیورٹی کے حصار میں قائداعظم انٹرنیشنل ایئرپورٹ سے مقامی ہوٹل منتقل کیا گیا۔ پاکستان اور جنوبی افریقا کی انڈر 19 ٹیموں کے درمیان 5 ٹی ٹوئنٹی میچز پر مشتمل یہ اہم سیریز 14 سے 24 جولائی تک نیشنل بینک اسٹیڈیم کراچی میں کھیلی جائے گی، جس کا مقصد آئندہ اے سی سی ایشیا کپ اور آئی سی سی ورلڈ کپ کی بھرپور تیاری ہے۔ سیریز میں پاکستانی ٹیم کی قیادت فضا فیاض جبکہ مہمان ٹیم کی کمان نیکی وین سورس سنبھالیں گی۔ دونوں ٹیمیں 11 سے 13 جولائی تک فلڈ لائٹس میں تربیتی سیشنز کا آغاز کریں گی، جبکہ 13 جولائی کو ٹرافی کی رونمائی اور دونوں کپتانوں کی پریس کانفرنس ہوگی۔ سیریز کا پہلا میچ 14، دوسرا 17، تیسرا 19، چوتھا 22 اور آخری میچ 24 جولائی کو کھیلا جائے گا۔ پاکستان اسکواڈ میں الزوہہ حماد، اقصیٰ حبیب، عریشہ انصاری اور کومل خان سمیت 17 کھلاڑی شامل ہیں، جن کی کوچنگ کے فرائض محمد مسرور اور سابق انٹرنیشنل کرکٹر جویریہ رؤف (فیلڈنگ کوچ) انجام دے رہی ہیں۔