صومالیہ کا متحدہ عرب امارات سے تمام معاہدے ختم کرنے کا اعلان

صومالیہ کی کابینہ نے متحدہ عرب امارات کے ساتھ تمام معاہدے منسوخ کرنے کا فیصلہ کر لیا ہے۔ عرب میڈیا کے مطابق موغادیشو میں ہونے والے کابینہ اجلاس میں کہا گیا کہ متحدہ عرب امارات صومالیہ کی وحدت، خودمختاری اور سالمیت کے خلاف سرگرمیوں میں ملوث ہے۔

کابینہ نے مؤقف اختیار کیا کہ امارات کی مبینہ مداخلت اور سرگرمیاں ایک آزاد اور خودمختار ریاست کے لیے خطرہ ہیں اور یہ دیگر ممالک کی خودمختاری کے احترام کے بین الاقوامی اصولوں کی خلاف ورزی ہے۔

صومالی کابینہ کا کہنا ہے کہ امارات کی مداخلت سے متعلق صومالیہ کے پاس ٹھوس شواہد موجود ہیں۔ اسی بنیاد پر امارات کے ساتھ تمام سیکیورٹی اور دفاعی تعاون کے معاہدے ختم کر دیے گئے ہیں۔

اعلامیے کے مطابق متحدہ عرب امارات کے ساتھ صومالیہ کی تین بندرگاہوں سے متعلق معاہدے بھی منسوخ کر دیے گئے ہیں۔