سال کا پہلا سورج گرہن آج ہوگا۔۔ کہاں نظر آئے گا اور کہاں نہیں؟

ماہرین فلکیات کے مطابق آج، 17 فروری 2026 کو سال کا پہلا سورج گرہن لگے گا، تاہم یہ پاکستان میں نظر نہیں آئے گا۔ بین الاقوامی خلائی ویب سائٹس کی رپورٹ کے مطابق یہ ایک حلقوی (اینولر) گرہن ہوگا، جس کے دوران چاند سورج کے عین درمیان میں آ جائے گا لیکن اسے مکمل طور پر نہیں چھپائے گا۔

اس منظر کو عام طور پر ’رِنگ آف فائر‘ کہا جاتا ہے، جب سورج کے کنارے سے روشنی چھن کر ایک سنہری انگوٹھی کی شکل میں دکھائی دیتی ہے۔ مکمل گرہن صرف انٹارکٹیکا کے چند علاقوں میں دکھائی دے گا جبکہ جنوبی امریکہ کے ممالک جیسے چلی اور ارجنٹائن اور جنوبی افریقہ کے کچھ حصوں میں جزوی گرہن نظر آئے گا۔

پاکستان میں گرہن دیکھنے کے شوقین افراد کو یہ موقع نہیں ملے گا، تاہم پاکستانی وقت کے مطابق گرہن کا آغاز دوپہر 12:01 بجے ہوگا اور دو گھنٹے تک جاری رہ سکتا ہے۔ ماہرین نے خبردار کیا ہے کہ سورج گرہن کو براہ راست دیکھنا آنکھوں کے لیے نقصان دہ ہے، اس لیے صرف خصوصی سولر فلٹر یا منظور شدہ حفاظتی چشموں کے ساتھ ہی اس کا مشاہدہ ممکن ہے۔