الیکشن کمیشن کا سہیل آفریدی کے دھمکی آمیز بیان پر نوٹس، آج اجلاس ہوگا

الیکشن کمیشن نے وزیر اعلیٰ خیبرپختونخوا سہیل آفریدی کے خلاف نوٹس جاری کر دیا ہے جنہوں نے ضمنی انتخاب کے دوران سرکاری ملازمین کے خلاف دھمکی آمیز الفاظ استعمال کیے۔

ذرائع کے مطابق الیکشن کمیشن نے آج صبح ساڑھے 11 بجے اجلاس طلب کر لیا ہے، جس میں سہیل آفریدی کے بیان پر قانونی کارروائی کے امکانات پر غور کیا جائے گا۔

واضح رہے کہ سہیل آفریدی نے ایبٹ آباد میں جلسے سے خطاب کرتے ہوئے کہا تھا کہ 23 نومبر کو ہونے والے ضمنی انتخاب میں تحریک انصاف کی امیدوار عمر ایوب کی اہلیہ دو لاکھ ووٹ لے کر کامیاب ہوں گی۔ انہوں نے انتظامیہ اور پولیس کو خبردار کرتے ہوئے کہا کہ اگر الیکشن کے دن کوئی بدمزگی ہوئی تو متعلقہ اہلکار رات تک عہدوں پر نہیں رہیں گے۔