جب تک عمران خان نہیں کہیں گے، سہیل آفریدی وزیراعلیٰ رہیں گے: جنید اکبر

پاکستان تحریک انصاف (پی ٹی آئی) کے سینئر رہنما جنید اکبر نے واضح کیا ہے کہ جب تک بانی پی ٹی آئی عمران خان کی ہدایت نہیں ہوگی، سہیل آفریدی ہی خیبرپختونخوا کے وزیراعلیٰ رہیں گے۔ نجی ٹی وی پروگرام میں گفتگو کرتے ہوئے جنید اکبر نے کہا کہ سہیل آفریدی کو پارٹی کارکنان اور عوام کی مکمل حمایت حاصل ہے۔ انہوں نے کہا کہ تحریک انصاف کا حتمی فیصلہ صرف بانی پی ٹی آئی کرتے ہیں اور ان کا ہر حکم پارٹی کے لیے قابلِ قبول ہے، جبکہ کسی دوسرے فرد یا گروپ کی ذاتی خواہشات کی کوئی اہمیت نہیں ہے۔

سابق وزیراعلیٰ علی امین گنڈاپور کے حوالے سے ایک سوال کے جواب میں جنید اکبر نے تبصرہ کرنے سے معذرت کرتے ہوئے کہا کہ ان کے ساتھ ماضی میں تعلقات اچھے نہیں رہے۔ سیاسی اور ملکی صورتحال پر بات کرتے ہوئے ان کا کہنا تھا کہ دہشت گردی کے خلاف جنگ میں خیبرپختونخوا کے عوام اور پی ٹی آئی نے سب سے زیادہ قربانیاں دی ہیں۔ انہوں نے دعویٰ کیا کہ حکومت کی جانب سے جگہ جگہ کنٹینرز لگانے سے انتظامیہ کی بوکھلاہٹ ظاہر ہوتی ہے۔ رہنما پی ٹی آئی نے مزید کہا کہ ہم مذاکرات اور ڈائیلاگ پر یقین رکھتے ہیں، جس کے لیے پارٹی نے چار رکنی کمیٹی بھی تشکیل دی ہے کیونکہ ہماری پہلی ترجیح ملک ہے اور سیاست بعد میں۔