ملک کے مختلف علاقوں میں سموگ اور شدید دھند کا الرٹ جاری

نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر نے ملک کے مختلف علاقوں میں سموگ اور شدید دھند کی ممکنہ صورتحال کے پیش نظر الرٹ جاری کر دیا ہے۔ بڑھتی ہوئی سموگ کے باعث متعدد شہروں میں ٹریفک کی روانی متاثر ہونے کا امکان ظاہر کیا گیا ہے۔

این ڈی ایم اے کے مطابق پنجاب کے مختلف شہروں جن میں لاہور، فیصل آباد، ملتان، بہاولپور، سیالکوٹ، گوجرانوالہ اور شیخوپور شامل ہیں، وہاں دھند اور سموگ میں شدید اضافے کا خدشہ ہے۔ اس کے علاوہ راولپنڈی، اسلام آباد، خیبر پختونخواہ کے متعدد علاقوں اور سندھ کے بالائی حصوں میں بھی دھند کی شدت میں اضافہ متوقع ہے۔الرٹ میں بتایا گیا ہے کہ 20 دسمبر تک رات اور علی الصبح کے اوقات میں دھند کے باعث حدِ نگاہ نمایاں طور پر کم ہو سکتی ہے، جس کے نتیجے میں ٹریفک حادثات کے امکانات بڑھ جاتے ہیں۔این ڈی ایم اے نے ڈرائیور حضرات کو ہدایت کی ہے کہ وہ شدید دھند کے دوران غیر ضروری سفر سے گریز کریں اور اگر سفر ناگزیر ہو تو رفتار کم رکھیں، فوگ لائٹس کا استعمال کریں اور مناسب فاصلہ برقرار رکھیں تاکہ کسی بھی ناخوشگوار حادثے سے بچا جا سکے۔ترجمان کے مطابق این ڈی ایم اے نے تمام متعلقہ اداروں کو دھند اور سموگ کے ممکنہ اثرات سے نمٹنے کے لیے خصوصی اور بروقت اقدامات کی ہدایات بھی جاری کر دی ہیں۔