کرسمس پر سندھ حکومت کا اہم فیصلہ، مسیحی برادری کے لیے 26 دسمبر کو بھی اضافی عام تعطیل کا اعلان

کراچی: سندھ حکومت نے کرسمس کی تقریبات کے پیش نظر مسیحی برادری کے لیے 26 دسمبر 2025 کو بھی عام تعطیل کا اعلان کر دیا ہے۔ یہ فیصلہ اقلیتی برادری کو اپنے مذہبی تہوار بھرپور طریقے سے منانے کا موقع فراہم کرنے اور مذہبی ہم آہنگی کو فروغ دینے کے مقصد سے کیا گیا ہے۔

حکومت سندھ کے محکمہ سروسز، جنرل ایڈمنسٹریشن اینڈ کوآرڈینیشن کی جانب سے جاری کردہ نوٹیفکیشن کے مطابق، یہ اضافی تعطیل صرف مسیحی برادری کے لیے ہوگی۔ اس روز سندھ حکومت کے زیرِ انتظام تمام سرکاری، خودمختار، نیم سرکاری ادارے، کارپوریشنز اور لوکل کونسلز بند رہیں گے۔ تاہم، نوٹیفکیشن میں واضح کیا گیا ہے کہ انتہائی ضروری خدمات سے وابستہ عملہ اس تعطیل سے مستثنیٰ ہو گا۔

واضح رہے کہ حکومت سندھ 25 دسمبر کو بانی پاکستان قائد اعظم محمد علی جناح کے یومِ پیدائش اور کرسمس کے موقع پر بھی عام تعطیل کا باضابطہ نوٹیفکیشن پہلے ہی جاری کر چکی ہے، جس کا اطلاق تمام سرکاری، نیم سرکاری اداروں اور سندھ حکومت کے ماتحت دیگر اداروں پر ہو گا۔ اس طرح مسیحی برادری کو کرسمس کے تہوار پر دو دن کی تعطیلات میسر ہوں گی۔