میر رضا کیس، سندھ کابینہ کا جوڈیشل انکوائری کروانے کا فیصلہ

کراچی کے نوجوان تاجر میر رضا کی ہلاکت کے معاملے میں سندھ حکومت نے اہم پیش رفت کرتے ہوئے واقعے کی جوڈیشل انکوائری کروانے کا فیصلہ کیا ہے۔ سندھ کابینہ کی جانب سے سرکولیشن سمری کے ذریعے منظوری کے بعد چیف جسٹس سندھ ہائی کورٹ کو خط لکھ دیا گیا ہے۔ دوسری جانب کیس کی تفتیش کے دوران پولیس نے میر رضا کی سم بحال کر کے ان کی والدہ کے نام منتقل کر دی ہے تاکہ واٹس ایپ ڈیٹا کا بیک اپ حاصل کر کے تفتیش کو آگے بڑھایا جا سکے۔ پولیس کو موصول شدہ پیغامات سے معلوم ہوا ہے کہ میر رضا شدید معاشی و گھریلو مشکلات کا شکار تھا۔ تفتیشی ٹیم کی جانب سے تیار کردہ آخری 12 گھنٹوں کی ٹائم لائن کے مطابق میر رضا موت سے کچھ دیر قبل تک شارع فیصل اور ٹیپو سلطان روڈ پر سرمائے کے حصول اور ایک کروڑ روپے کے بینک قرضے کے معاملات میں سرگرم تھا۔