سندھ حکومت صحت کے شعبے میں سب سے بڑی پارٹنر ہے، بلاول بھٹو زرداری

چیئرمین پیپلز پارٹی بلاول بھٹو زرداری نے کہا ہے کہ انہیں فخر ہے کہ سندھ حکومت صحت کے شعبے میں سب سے بڑی پارٹنر ہے اور یہ خوشی کی بات ہوگی اگر انڈس اسپتال دیگر اضلاع میں بھی پارٹنرشپ کرے، خصوصاً سندھ کے پسماندہ علاقوں کی نشاندہی کر کے مشترکہ منصوبے شروع کیے جائیں۔

بلاول بھٹو زرداری نے کہا کہ قمبر شہدادکوٹ جیسے پسماندہ علاقوں میں صحت کی سہولیات کی اشد ضرورت ہے۔ انہوں نے بتایا کہ سندھ حکومت کی ایس آئی یو ٹی، چائلڈ لائف فاؤنڈیشن اور دیگر اداروں کے ساتھ مؤثر پارٹنرشپ موجود ہے۔

انہوں نے کہا کہ گمبٹ اسپتال، جو خیرپور کی ایک تحصیل میں واقع ہے، سو فیصد مفت علاج فراہم کر رہا ہے اور ایسی سہولت لاہور جیسے بڑے شہر میں بھی موجود نہیں۔ انہوں نے کہا کہ سندھ کے صحت کے ماڈل کو عالمی سطح پر تسلیم کیا جاتا ہے۔

بلاول بھٹو زرداری نے این آئی سی وی ڈی کو دنیا کا سب سے بڑا مفت علاج فراہم کرنے والا مرکز قرار دیتے ہوئے انڈس اسپتال کی ٹیم، پارٹنرز اور فنڈ ریزرز کا شکریہ ادا کیا اور کہا کہ سندھ حکومت نے عملی طور پر صحت کے نظام میں بہتری لا کر دکھائی ہے۔