سندھ حکومت کا جعلی فٹنس سرٹیفکیٹس استعمال کرنے والی گاڑیوں کے خلاف کریک ڈاؤن

کراچی: سندھ حکومت کے محکمہ ٹرانسپورٹ نے جعلی فٹنس سرٹیفکیٹس استعمال کرنے والی گاڑیوں کے خلاف کارروائی شروع کر دی ہے۔ سینئر وزیر شرجیل انعام میمن نے پی ٹی اے سیکریٹری کو ہدایت کی کہ تمام مشکوک گاڑیوں کے روٹ پرمٹس منسوخ کیے جائیں اور جعلی سرٹیفکیٹس استعمال کرنے والے گاڑیوں کا ریکارڈ محکمہ کی لائیو پورٹل پر اپڈیٹ کیا جائے۔

وزیر شرجیل انعام میمن نے تین دن کے اندر کارروائی کی تفصیلی رپورٹ پیش کرنے کا بھی حکم دیا۔ انہوں نے کہا کہ بعض ٹرانسپورٹرز اپنی گاڑیوں کے فزیکل معائنے سے بچنے کے لیے ایجنٹس کے ذریعے جعلی فٹنس سرٹیفکیٹس حاصل کر رہے تھے۔

شرجیل انعام میمن نے واضح کیا کہ جعلی فٹنس سرٹیفکیٹس کا استعمال نہ صرف قوانین کی سنگین خلاف ورزی ہے بلکہ عوامی تحفظ کے لیے بھی بڑا خطرہ ہے۔ انہوں نے کہا کہ عوام کی جان و مال سے کھیلنے کی کسی کو اجازت نہیں دی جائے گی اور حکومت ٹرانسپورٹ نظام کو محفوظ، شفاف اور قانون کے مطابق بنانے کے لیے پرعزم ہے۔

وزیر نے اعلان کیا کہ جو بھی اس غیر قانونی عمل میں ملوث پایا گیا، چاہے وہ ٹرانسپورٹر ہو یا ایجنٹ، اس کے خلاف بلا امتیاز کارروائی کی جائے گی۔