سندھ کابینہ کا اجلاس: تھرڈ پارٹی موٹر انشورنس نئے سال سے لازمی قرار

کراچی میں وزیر اعلیٰ سندھ سید مراد علی شاہ کی صدارت میں سندھ کابینہ کا اجلاس منعقد ہوا، جس میں 12 ایجنڈا آئٹمز پر غور کے بعد اہم فیصلے کیے گئے۔ اجلاس میں صوبائی وزراء، مشیران، خصوصی معاونین، چیف سیکریٹری اور متعلقہ افسران نے شرکت کی۔

کابینہ نے فیصلہ کیا کہ موٹر تھرڈ پارٹی انشورنس نئے سال سے نافذ کی جائے گی، جس کے لیے موٹر وہیکل آرڈیننس میں ترمیم کی منظوری دی گئی۔ تھرڈ پارٹی موٹر انشورنس پر سیلز ٹیکس 15 فیصد سے کم کر کے 5 فیصد کر دیا گیا، جبکہ انشورنس کلیمز کے لیے 24 گھنٹے ہیلپ لائن قائم کرنے کی ہدایت بھی جاری کی گئی۔ وزیراعلیٰ سندھ کے مطابق اس اقدام سے ٹریفک حادثات میں متاثرہ افراد کو قانونی طور پر معاوضہ مل سکے گا۔

کابینہ نے انٹر پروونشل کوآرڈینیشن (آئی پی سی) ڈیپارٹمنٹ کے قواعد میں ترمیم، سندھ گورنمنٹ رولز آف بزنس 1986 کو اپ ڈیٹ کرنے اور بین الصوبائی و وفاقی رابطہ کاری کو مزید مؤثر بنانے کی منظوری دی۔

اجلاس میں سندھ لینڈ ریونیو ایکٹ میں ترمیمی بل 2025 منظور کیا گیا، جس کے تحت لینڈ ریکارڈ کی ڈیجیٹلائزیشن، ای ٹرانسفر آف ٹائٹل سسٹم اور بلاک چین بیسڈ ڈیٹا بیس نافذ کیا جائے گا۔ سکھر آئی بی اے یونیورسٹی اس منصوبے کی سروس پرووائیڈر ہوگی۔

مزید برآں، کابینہ نے وزیراعظم کی ہدایت پر کراچی اور ٹنڈو محمد خان میں دانش اسکولز کے قیام کے لیے زمین الاٹ کرنے اور صوبے بھر میں اصلاحات تیز کرنے کی منظوری بھی دے دی۔