سکھ فار جسٹس کا بھارت میں مسیحیوں کیلئے محفوظ وطن ’’ٹرمپ لینڈ‘‘ کا مطالبہ

سکھ فار جسٹس تنظیم کی جانب سے بھارت میں عیسائیوں کے لیے ایک محفوظ وطن ’’ٹرمپ لینڈ‘‘ کے قیام کا مطالبہ سامنے آ گیا ہے۔ تنظیم نے اقوامِ متحدہ کے تسلیم شدہ حقِ خود ارادیت کے تحت شمال مشرقی بھارت میں مجوزہ عیسائی وطن کا نقشہ بھی جاری کیا ہے۔ سکھ فار جسٹس کے رہنما گرپتونت سنگھ پنوں نے کہا کہ یہ خطہ امریکی صدر ڈونلڈ ٹرمپ کے نام سے منسوب ہوگا اور اس حوالے سے انہوں نے امریکی صدر سے براہِ راست مداخلت کی اپیل کی ہے۔
تنظیم کے مطابق سیون سسٹرز اسٹیٹس میں اکثریتی عیسائی آبادی کو منظم تشدد، حملوں اور جبر کا سامنا ہے، جبکہ ’’ٹرمپ لینڈ‘‘ کو ایک محفوظ عیسائی کوریڈور کے طور پر تجویز کیا گیا ہے تاکہ متاثرہ عیسائیوں کو تحفظ فراہم کیا جا سکے۔