کاروباری اوقات میں توسیع: دکانیں اور بازار رات 9 بجے تک کھلے رکھنے کی اجازت

نائب وزیراعظم اسحاق ڈار کی زیر صدارت کفایت شعاری اقدامات کی نگرانی اور عملدرآمد سے متعلق کمیٹی کے اجلاس میں ملک بھر میں دکانوں، بازاروں اور شاپنگ مالز کے اوقاتِ کار میں توسیع کا اہم فیصلہ کیا گیا ہے۔

فیصلے کے مطابق اب ملک بھر میں دکانیں، بازار اور عمومی ریٹیل کاروبار رات نو بجے تک کھلے رہ سکیں گے۔ اجلاس میں یہ فیصلہ شدید گرمی اور دن کے طویل دورانیے کے پیش نظر کیا گیا۔

کمیٹی کے مطابق ریٹیل کاروبار اور شاپنگ مالز کو رات نو بجے تک کھلے رکھنے کی اجازت ہوگی جبکہ ریسٹورنٹس، کیفے اور دیگر کھانے پینے کے مراکز رات گیارہ بجے تک کام کر سکیں گے۔

اجلاس میں واضح کیا گیا کہ شادی ہالز اور تقریبات کے مقامات پر یہ نرمی لاگو نہیں ہوگی اور وہ پہلے کی طرح رات دس بجے بند کیے جائیں گے۔

اسی طرح فارمیسیز، اسپتال، پٹرول پمپس اور آئی ٹی و ٹیلی کام سروسز کو اس پابندی سے مکمل استثنیٰ حاصل ہوگا اور وہ معمول کے مطابق خدمات جاری رکھ سکیں گے۔

نائب وزیراعظم نے تمام صوبوں کو ہدایت کی کہ وہ وفاقی حکومت کے ساتھ قریبی رابطے میں رہتے ہوئے ان نئے اوقاتِ کار پر سختی سے عملدرآمد یقینی بنائیں۔