گولی پہلے ماریں گے، سوال بعد میں پوچھیں گے: ڈنمارک کی امریکا کو دھمکی

ڈنمارک کے وزیر دفاع نے خبردار کیا ہے کہ گرین لینڈ پر کسی بھی قسم کے حملے کی صورت میں ڈنمارک کی مسلح افواج ’’گولی پہلے اور سوال بعد میں‘‘ کی پالیسی کے تحت فوری کارروائی کریں گی۔

اپنے بیان میں ڈنمارک کے وزیر دفاع نے بالواسطہ طور پر امریکا کو خبردار کرتے ہوئے کہا کہ اگر گرین لینڈ پر حملہ ہوا تو فوج احکامات کا انتظار کیے بغیر فوری جواب دے گی۔ ان کا کہنا تھا کہ گرین لینڈ ڈنمارک کے اندر ایک خودمختار علاقہ ہے اور اس کی سلامتی پر کوئی سمجھوتہ نہیں کیا جا سکتا۔

اس سے قبل سات یورپی ممالک نے ایک مشترکہ بیان میں واضح کیا تھا کہ گرین لینڈ کے مستقبل یا اس سے متعلق کسی بھی فیصلے کا اختیار صرف گرین لینڈ اور ڈنمارک کو حاصل ہے، کسی بیرونی طاقت کو اس معاملے میں مداخلت کا حق نہیں۔

دوسری جانب امریکی نائب صدر جے ڈی وینس نے گرین لینڈ کے معاملے پر یورپی رہنماؤں کو خبردار کرتے ہوئے کہا ہے کہ اگر یورپ نے گرین لینڈ کی سکیورٹی کو سنجیدگی سے نہ لیا تو امریکا خود کارروائی کر سکتا ہے۔ ان کے مطابق گرین لینڈ عالمی میزائل دفاعی نظام کے لیے نہایت اہم ہے اور بعض مخالف طاقتیں بھی اس خطے میں دلچسپی کا اظہار کر رہی ہیں۔

سیاسی مبصرین کے مطابق گرین لینڈ کی اسٹریٹجک اہمیت کے باعث امریکا اور یورپ کے درمیان کشیدگی میں اضافہ ہو رہا ہے، جبکہ ڈنمارک کے حالیہ سخت بیان نے اس تنازع کو مزید حساس بنا دیا ہے۔