پیپلزپارٹی نے کوشش کی مذاکرات کی میز پر معاملات حل کر لئے جائیں: شیری رحمان

پاکستان پیپلز پارٹی (PPP) کی سينئر رہنما سینیٹر شیری رحمان نے ایوان میں گفتگو کرتے ہوئے کہا ہے کہ ان کی پارٹی نے ہمیشہ مسائل کو بات چیت سے حل کرنے کی کوشش کی ہے اور حکومت کو بھی مذاکرات کے راستے پر لانے کے لیے قائل کیا ہے۔

سینیٹ کے اجلاس میں اظہارِ خیال کرتے ہوئے شیری رحمان نے کہا کہ شہید ذوالفقار علی بھٹو کے دیے گئے 1973ء کے آئین نے ہی ملک کو متحد رکھا ہوا ہے اور ہم نہیں چاہتے کہ پاکستان دوبارہ کسی سیاسی یا آئینی تجربے سے دوچار ہو۔ انہوں نے سیکیورٹی صورتحال پر بات کرتے ہوئے واضح کیا کہ دہشت گردی ہمارے لیے سرخ لکیر (Red Line) ہے۔

شیری رحمان نے یاد دہانی کرائی کہ محترمہ بینظیر بھٹو کی شہادت سمیت ملک میں ہونے والے متعدد بڑے سانحات کے پیچھے کالعدم تحریکِ طالبان پاکستان (TTP) کا ہاتھ تھا۔ انہوں نے کہا کہ ملک کو درپیش چیلنجز سے نمٹنے کے لیے سیاسی تقسیم کی سیاست ترک کر کے تعلیم، غربت کے خاتمے اور دیگر اہم عوامی مسائل پر متحد ہو کر کام کرنا ہوگا۔