آزاد کشمیر انتخابات: 34 شکایات درج کرائیں، الیکشن کمیشن نے کارروائی نہیں کی: شیری رحمان

پاکستان پیپلز پارٹی کی نائب صدر سینیٹر شیری رحمان نے دعویٰ کیا ہے کہ آزاد کشمیر قانون ساز اسمبلی کے انتخابات کے دوسرے مرحلے میں بے ضابطگیوں اور دھاندلی سے متعلق پارٹی کی جانب سے الیکشن کمیشن کو مجموعی طور پر 34 باضابطہ شکایات جمع کرائی گئیں، تاہم الیکشن کمیشن نے کسی ایک شکایت پر بھی ایکشن نہیں لیا۔ سماجی رابطے کی ویب سائٹ ایکس پر اپنے ایک بیان میں وفاقی حکومت کے ان دعوؤں کی تردید کرتے ہوئے انہوں نے سوال اٹھایا کہ کیا کسی نے کہا تھا کہ پیپلز پارٹی نے بے ضابطگیوں کی کوئی شکایت درج نہیں کرائی؟ شیری رحمان نے اپنے بیان کی تصدیق کے لیے الیکشن کمیشن کو بھیجی گئی تمام 34 شکایات کی تفصیلی فہرست بھی سوشل میڈیا پر شیئر کی اور الیکشن کمیشن کی جانب سے ان شکایات کو نظر انداز کرنے پر شدید تشویش کا اظہار کیا۔