نکیال پولنگ میں کارکن کی ہلاکت، شیری رحمان کا فوری نوٹس کا مطالبہ

پاکستان پیپلز پارٹی کی نائب صدر سینیٹر شیری رحمان نے نکیال میں پولنگ کے دوران فائرنگ سے پارٹی کارکن مختار یونس کی ہلاکت اور دو افراد کے زخمی ہونے کے واقعے کی شدید الفاظ میں مذمت کی ہے۔ انہوں نے ن لیگ کے امیدوار سردار عمیر نعیم پر خوف و ہراس پھیلانے کا الزام عائد کرتے ہوئے کہا کہ شکست کے خوف سے انسانی جانیں ضائع کرنا نا قابلِ قبول ہے۔ شیری رحمان نے الیکشن کمیشن سے فوری نوٹس لینے اور قاتلوں کو بلا تاخیر گرفتار کر کے سخت سزا دینے کا مطالبہ کیا۔ انہوں نے زور دیا کہ انتخابی عمل کو پرامن اور شفاف بنانا انتظامیہ کی ذمہ داری ہے، جبکہ شہید کے لواحقین سے تعزیت اور زخمیوں کی جلد صحتیابی کی دعا بھی کی۔