پاکستان تحریک انصاف (پی ٹی آئی) کے رہنما شیر افضل مروت نے دعویٰ کیا ہے کہ حکومت پی ٹی آئی کو مکمل طور پر دیوار سے لگانا چاہتی ہے اور حکومتی وزرا کے بیانات اس کا کھلا ثبوت ہیں۔ دنیا نیوز کے پروگرام ’’بات نکلے گی‘‘ میں گفتگو کرتے ہوئے انہوں نے کہا کہ بیک ڈور یا پس پردہ مذاکرات کا سلسلہ تو گزشتہ تین سالوں سے چل رہا ہے، لیکن اس وقت صورتِ حال یہ ہے کہ تحریک انصاف بیک فٹ پر ہے جبکہ حکومت کھلے عام برتری حاصل کر کے کھیل رہی ہے۔ انہوں نے انتباہ کیا کہ پی ٹی آئی کا واحد مضبوط قلعہ اس وقت خیبرپختونخوا ہے، اور مقتدرہ و حکومت مل کر پارٹی کو اس قلعے اور انتظامی اقتدار سے محروم کرنے کی منصوبہ بندی کر رہے ہیں۔

شیر افضل مروت نے خیبرپختونخوا میں ممکنہ گورنر راج کی مخالفت کرتے ہوئے کہا کہ اگر وہاں گورنر راج نافذ کیا گیا تو پی ٹی آئی والے سیاسی شہید بن جائیں گے اور صوبے میں نفرت و غصے کی لہر مزید بڑھے گی۔ پارٹی کی داخلی صورتِ حال پر بات کرتے ہوئے انہوں نے انکشاف کیا کہ بانی پی ٹی آئی عمران خان کی صحیح ہدایات اور پیغام پارٹی قیادت تک درست طریقے سے نہیں پہنچایا جا رہا۔ انہوں نے پارٹی کے مرکزی احتجاج کے منتظمین پر تنقید کرتے ہوئے کہا کہ جن رہنماؤں کو احتجاج کی ذمہ داری دی گئی وہ “راؤنگ نمبر” ثابت ہوئے، جبکہ بانی کی نمائندگی کرنے والے بیرسٹر گوہر کو بھی پارٹی کے اندر مطلوبہ پذیرائی نہیں مل رہی۔