فیروزوالہ میں بند ٹوٹنے سے ایک ہی گھر کے تین بچے پانی میں ڈوب کر جاں بحق

پنجاب کے ضلع شیخوپورہ کے علاقے فیروزوالہ کی پٹھان کالونی میں نالہ بھیڑ کا بند ٹوٹنے کے باعث انتہائی افسوسناک حادثے میں ایک ہی گھر کے 3 کمسن بچے پانی میں ڈوب کر جاں بحق ہو گئے ہیں۔ ریسکیو ذرائع کے مطابق جاں بحق ہونے والے بچوں کی شناخت دانیال، نعمان اور برہان کے ناموں سے ہوئی ہے جو گھر کے قریب جمع شدہ گہرے پانی میں نہاتے ہوئے ڈوب گئے۔ ریسکیو ٹیموں نے بچوں کو نکال کر ہسپتال منتقل کیا جہاں طبی عملے نے ان کی موت کی تصدیق کر دی۔ المناک واقعے کے بعد علاقے میں غم کی لہر دوڑ گئی جبکہ شہریوں نے انتظامیہ سے نالوں اور بندوں کی بروقت مرمت کا مطالبہ کیا ہے۔