متحدہ عرب امارات کے صدر شیخ محمد بن زاید اسلام آباد پہنچ گئے، شاندار تاریخی استقبال

متحدہ عرب امارات کے صدر شیخ محمد بن زاید پاکستان کے پہلے سرکاری دورے پر اسلام آباد پہنچ گئے، جہاں پاکستان کی حدود میں داخل ہوتے ہی ان کا شاندار اور تاریخی استقبال کیا گیا۔ معزز مہمان کا طیارہ نور خان ایئر بیس پر اترا۔

دورے کے دوران صدر شیخ محمد بن زاید کی صدرِ مملکت آصف علی زرداری، وزیراعظم شہباز شریف اور دیگر اعلیٰ شخصیات سے ملاقاتیں شیڈول ہیں۔ دفترِ خارجہ کے مطابق یو اے ای کے صدر کے ہمراہ وزرا اور سینئر حکام پر مشتمل اعلیٰ سطح کا وفد بھی پاکستان آیا ہے۔

دفتر خارجہ کا کہنا ہے کہ یہ دورہ پاکستان اور متحدہ عرب امارات کے درمیان طویل المدتی، برادرانہ اور دیرینہ تعلقات کی عکاسی کرتا ہے۔ ملاقاتوں میں دوطرفہ تعلقات، تجارت، سرمایہ کاری، توانائی، ترقی، علاقائی استحکام اور عالمی امور پر تبادلہ خیال کیا جائے گا۔

صدر یو اے ای کے دورہ پاکستان کے موقع پر اسلام آباد میں عام تعطیل کا اعلان کیا گیا ہے۔ پاکستان سیکرٹریٹ، تمام وفاقی ادارے، سینیٹ سیکرٹریٹ، قومی اسمبلی سیکرٹریٹ، اسلام آباد ہائیکورٹ اور ڈسٹرکٹ کورٹس آج بند رہیں گی، جبکہ وفاقی آئینی عدالت کی کاز لسٹ بھی منسوخ کر دی گئی ہے۔

کابینہ ڈویژن کے مطابق اسلام آباد کے ہسپتال، بینک، ضروری سروسز، میٹروپولیٹن کارپوریشن، سی ڈی اے، اسلام آباد انتظامیہ، پولیس، آئیسکو اور سوئی ناردرن گیس کے دفاتر کھلے رہیں گے۔