مذاکرات کی ناکامی کے ذمہ دار وفاقی وزراء ہیں: شوکت یوسفزئی

پاکستان تحریک انصاف (پی ٹی آئی) خیبرپختونخوا کے ترجمان شوکت یوسفزئی نے وفاقی وزراء کی پریس کانفرنس پر شدید ردعمل کا اظہار کرتے ہوئے کہا ہے کہ مذاکرات کی ناکامی کی اصل ذمہ دار وفاقی حکومت اور اس کے وزراء ہیں۔ انہوں نے سوال اٹھایا کہ اگر 99 فیصد معاملات پر اتفاق رائے ہو چکا تھا تو حکومت مذاکرات سے کیوں پسپا ہو گئی، اور باقی ماندہ ایک فیصد مسئلے کو حل کرنے کے لیے مزید وقت بھی دیا جا سکتا تھا۔ شوکت یوسفزئی نے پی ٹی آئی پر عائد کیے جانے والے تمام الزامات کو مسترد کرتے ہوئے کہا کہ بانی پی ٹی آئی سے ملاقات، ان کی صحت کے پیش نظر اسپتال منتقلی، کیسز کی فوری سماعت اور گرفتار رہنماؤں کی رہائی ہی تمام مسائل کا واحد حل ہے۔ انہوں نے مزید کہا کہ صوبے میں گورنر راج کا نفاذ 5 کروڑ عوام کے مینڈیٹ کی سنگین توہین ہوگی، اور پی ٹی آئی قیادت آج بھی مذاکرات کے لیے پرعزم ہے۔