ملٹری اے آئی کے استعمال میں انسانی فیصلہ سازی اور کنٹرول یقینی بنایا جائے: شرمیلا فاروقی

پاکستان کی رکن قومی اسمبلی ڈاکٹر شرمیلا فاروقی نے تنزانیہ کے شہر اروشا میں منعقدہ انٹر پارلیمنٹری یونین (آئی پی یو) کی 153ویں اسمبلی کے اجلاس میں شرکت کرتے ہوئے بین الاقوامی امن و سلامتی سے متعلق قائمہ کمیٹی کے سامنے ملٹری آرٹیفیشل انٹیلی جنس (Military AI) کے ذمہ دارانہ استعمال اور بین الاقوامی ضابطہ کار سے متعلق پاکستان کے مؤقف کی ترجمانی کی ہے۔ ڈاکٹر شرمیلا فاروقی نے زور دیا کہ عسکری شعبے میں مصنوعی ذہانت کے استعمال میں ‘بامعنی انسانی کنٹرول’ اور فیصلہ سازی کو ہر صورت برقرار رکھا جانا چاہیے، کیونکہ جوابدہی کی ذمہ داری کسی کمپیوٹر الگورتھم کے سپرد نہیں کی جا سکتی۔

انہوں نے کہا کہ مکمل طور پر خودکار مہلک ہتھیاروں کے نظام (LAWS) پر قانونی طور پر پابند بین الاقوامی قواعد تشکیل دینے کی اشد ضرورت ہے تاکہ غیر ارادی عسکری کشیدگی کو روکا جا سکے۔ انہوں نے خبردار کیا کہ بالخصوص جنوبی ایشیا جیسے حساس اور جوہری خطے میں اے آئی پر مبنی تیز رفتار فیصلوں سے غلط فہمیاں اور سنگین خطرات جنم لے سکتے ہیں۔ ڈاکٹر شرمیلا فاروقی کا کہنا تھا کہ ملٹری اے آئی سے متعلق عالمی پالیسی سازی کا عمل کثیرالجہتی اور اقوامِ متحدہ کی زیرِ نگرانی ہونا چاہیے جس میں ترقی پذیر ممالک کو مساوی نمائندگی ملے۔ انہوں نے متنبہ کیا کہ اے آئی جنگ کے عمل کو تیز کر سکتی ہے، مگر عالمی برادری کی ذمہ داری ہے کہ وہ اسے تنازعات میں اضافے کا ذریعہ نہ بننے دے۔