شنگھائی میں 15 اکتوبر کو سندھ حکومت کی سرمایہ کاری کانفرنس ہوگی: شرجیل میمن

وزیرِ اطلاعات سندھ شرجیل انعام میمن نے اعلان کیا ہے کہ سندھ حکومت 15 اکتوبر کو چین کے معاشی مرکز شنگھائی میں ایک عظیم الشان سرمایہ کاری کانفرنس کا انعقاد کرنے جا رہی ہے، جس میں چین کی صدہا بزنس کمپنیوں کو مدعو کیا گیا ہے۔ کراچی میں پریس کانفرنس کرتے ہوئے شرجیل میمن نے بتایا کہ وزیراعلیٰ سندھ کی سربراہی میں اعلیٰ سطح کا وفد چین کا دورہ کرے گا، جہاں سندھ میں سرمایہ کاری، انڈسٹریلائزیشن اور روزگار کے مواقع اجاگر کرنے کے لیے جی ٹو جی (G2G) اور بی ٹو بی (B2B) معاہدے طے پائیں گے۔

شرجیل انعام میمن نے پاک چین دوستی اور تھرپارکر کوئلے کے منصوبے کو ملکی معیشت کے لیے گیم چینجر قرار دیا۔ اس کے علاوہ انہوں نے صوبے میں 1,100 نئے اسکولوں کی تعمیر اور بنیادی ڈھانچے کی ترقی کے عزم کا اعادہ کیا۔ سیاسی صورتحال پر بات کرتے ہوئے انہوں نے الزام عائد کیا کہ اسلام آباد میں مذاکرات کا مثبت نتیجہ نکلنے والا تھا لیکن وزیراعلیٰ خیبر پختونخوا سہیل آفریدی نے بلاجواز الزامات لگا کر مذاکراتی عمل کو سبوتاژ کرنے کی کوشش کی، جس کی جتنی بھی مذمت کی جائے کم ہے۔