احتجاج کے نام پر جلاؤ گھیراؤ، توڑ پھوڑ، ہتھیار اٹھانے کی اجازت نہیں دی جا سکتی: شرجیل میمن

سندھ کے سینئر وزیر اور صوبائی وزیرِ اطلاعات شرجیل انعام میمن نے واضح کیا ہے کہ آئین اور قانون کے دائرے میں رہ کر احتجاج ہر سیاسی جماعت کا حق ہے، تاہم احتجاج کی آڑ میں جلاؤ گھیراؤ، سرکاری و نجی املاک کی توڑ پھوڑ یا قانون نافذ کرنے والے اداروں کے خلاف ہتھیار اٹھانے کی ہرگز اجازت نہیں دی جا سکتی۔ میڈیا سے گفتگو کرتے ہوئے شرجیل میمن کا کہنا تھا کہ پاکستان تحریکِ انصاف (پی ٹی آئی) کے متوقع لانگ مارچ کا بنیادی مقصد صرف اپنے بانی کی رہائی ہے، انہوں نے مزید کہا کہ اگر پی ٹی آئی کے لوگ واقعی سیاسی کارکن بن کر پرامن احتجاج کرتے تو 9 مئی جیسے افسوسناک اور پرتشدد واقعات کبھی رونما نہ ہوتے۔

اس موقع پر صوبائی وزیر ناصر حسین شاہ نے گفتگو کرتے ہوئے کہا کہ پی ٹی آئی کا احتجاج ہمیشہ پرتشدد اور انتشار انگیز ہوتا ہے، جس کے دوران پولیس اہلکاروں پر تشدد کیا جاتا ہے اور قومی املاک کو شدید نقصان پہنچایا جاتا ہے۔ انہوں نے خیبرپختونخوا کی امن و امان کی خراب صورتحال پر گہری تشویش کا اظہار کرتے ہوئے کہا کہ وہاں کے حالات مسلسل بگڑ رہے ہیں۔ ناصر حسین شاہ نے الزام عائد کیا کہ وزیراعلیٰ خیبرپختونخوا دہشت گردوں کے لیے نرم گوشہ رکھتے ہیں اور یہی وجہ ہے کہ صوبے میں انتظامی اور سکیورٹی بحران شدت اختیار کر رہا ہے۔