تحریک انصاف کی وجہ سے پورا اسلام آباد محاصرے میں رہا: شرجیل میمن

سینئر وزیر سندھ شرجیل انعام میمن نے کہا ہے کہ پاکستان تحریک انصاف کے احتجاجی سیاست کے باعث پورا اسلام آباد مسلسل محاصرے میں رہا، جس کی وجہ سے کنٹینرز لگانے اور ہٹانے پر حکومت کے کروڑوں روپے کے وسائل ضائع ہوئے۔ کراچی میں میڈیا سے گفتگو کرتے ہوئے شرجیل میمن نے مطالبہ کیا کہ سیاسی جماعتوں کو ملک و قوم کے مفاد میں ذمہ داری کا مظاہرہ کرنا چاہیے۔ انہوں نے کہا کہ ہماری پارٹی قیادت کو بھی ماضی میں گرفتار کیا گیا، لیکن ہم نے کبھی ایسے پرتشدد اور عوامی زندگی مفلوج کرنے والے راستے اختیار نہیں کیے۔

صوبائی وزیر نے کراچی کے ترقیاتی منصوبوں پر بات کرتے ہوئے بتایا کہ یونیورسٹی روڈ کی تعمیر و مرمت کا کام تقریباً مکمل ہو چکا ہے اور موسمیات فلائی اوور کا باضابطہ افتتاح کر دیا گیا ہے۔ انہوں نے ریکارڈ وقت میں کام مکمل کرنے پر پوری انجینئرنگ ٹیم کی کارکردگی کو سراہا۔ شرجیل میمن نے مزید کہا کہ اس منصوبے کی تکمیل سے یونیورسٹی روڈ پر شہریوں کو درپیش ٹریفک کی مشکلات ختم ہو گئی ہیں، جبکہ ریڈ لائن بی آر ٹی (BRT) کے اسٹیشنز اور دیگر انفراسٹرکچر کا کام بھی تیز رفتاری سے جاری ہے۔