شارجہ میں کتابوں کا عالمی میلہ آج سے شروع، 126 ممالک سے 17 لاکھ کتابیں توجہ کا مرکز

متحدہ عرب امارات کے ثقافتی مرکز شارجہ میں دنیا بھر کے علم و ادب کا عظیم الشان 45واں شارجہ بین الاقوامی کتاب میلہ ایکسپو سینٹر شارجہ میں شروع ہو گیا ہے جو 15 نومبر تک جاری رہے گا۔ اماراتی خبر رساں ایجنسی وام کے مطابق اس 12 روزہ میلے میں 126 ممالک سے 3,212 ناشرین اور نمائش کنندگان 17 لاکھ کتابوں کے ساتھ شریک ہیں، جبکہ 106 عالمی مہمانوں کی موجودگی میں 1,500 سے زائد ثقافتی و تخلیقی نشستیں منعقد کی جا رہی ہیں۔ اس سال سلطنتِ عمان کو ‘خصوصی مہمان ملک’ کا اعزاز دیا گیا ہے جس کا 50 رکنی وفد اپنی ادبی و تاریخی روایات پیش کر رہا ہے، جبکہ مراکشی محقق ڈاکٹر سعید یقطین کو ‘سال کی ثقافتی شخصیت’ کے اعزاز سے نوازا گیا ہے۔ میلے میں پاکستان کی معروف شیف کوثر راجہ بھی شریک ہیں، جبکہ زائرین کی سہولت کے لیے دبئی اور عجمان سے بس سروسز اور شارجہ سے مفت کشتی سروس سمیت خصوصی اضافی پارکنگ کے انتظامات کیے گئے ہیں۔